10 oktyabr 2024-cü il tarixində, oktyabr dünya kibertəhlükəsizlik maarifləndirmə ayı çərçivəsində, Kibertəhlükəsizlik Platforması və Azərbaycan Kibertəhlükəsizlik Təşkilatları Assosiasiyası (AKTA) birgə təşkilatçılığı ilə hashtagInfoSEC2024 layihəsinin üçüncü tədbiri uğurla həyata keçirildi.
İnformasiya təhlükəsizliyi, informasiya texnologiyaları, kompüter mühəndisliyi ixtisaslarında təhsil alan tələbələr üçün təşkil olunub. İnformasiya və kompüter texnologiyaları fakültəsinin dekan əvəzi professor Vaqif Qasımov çıxışında maarifləndirmə və kadr hazırlığına dəstək məqsədi daşıyan belə tədbirlərin tələbələrin bilik və bacarıqlarının artırılmasında böyük rol oynadığını bildirib. O, həmçinin tədbirdə müzakirə predmeti olacaq mövzularla bağlı fikirlərini diqqətə çatdırıb.
“InfoSEC-2024”ün 3-cü mərhələsinin BMU-da keçirilməsindən məmnun olduğunu deyən Kibertəhlükəsizlik Platformasının qurucusu Şahin Əliyev müasir dövrün ixtisaslarında oxuyan gənclərin gələcəkdə ölkənin milli təhlükəsizliyində rol alacaqlarını qeyd edib, bu baxımdan onların informasiya təhlükəsizliyini mükəmməl öyrənməli olduqlarını vurğulayıb.
AKTA-nın Tədqiqat və inkişaf şöbəsinin rəhbəri Təbriz Cəfərov isə assosiasiyanın məqsədinin gəncləri maarifləndirmək, onlara təcrübə qazandırmaq olduğunu bildirib, universitetlərdə yaradılan kiberklubların tələbələrin formalaşmasındakı mühüm roluna toxunub. O, kiberklublarda sərbəst inkişaf mühitinin müsbət təsirlərini sadalayıb və tələbələri təşəbbüskar olmağa çağırıb. “Azərbaycan Respublikasının informasiya təhlükəsizliyi və kibertəhlükəsizliyə dair 2023-2027-ci illər üçün Strategiyası” sənədindən bəhs edən T.Cəfərov bu strategiya ilə vətəndaş təsisatlarının üzərinə qoyulan vəzifələri nəzərə çatdırıb, kibertəhlükəsizliklə bağlı bütün vətəndaşların maarifləndirilməsinin vacibliyini söyləyib.
Sonra kibertəhlükəsizlik sahəsi üzrə mütəxəssislərin tələbələr üçün təlimi başlayıb. Təlimdə kibertəhlükəsizlik mövzusunun mühüm məqamları barədə geniş məlumat verilib və tələbələri maraqlandıran suallar cavablandırılıb.
